រដ្ឋមន្ដ្រីក្រសួងព័ត៌មានប្រតិកម្មនឹងសារព័ត៌មានមួយ
សារព័ត៌មាន Cambodia News/
ភ្នំពេញ (០៣ មករា ២០១៧) ៖ ក្រោយពីមានការផ្សព្វផ្សាយពីបណ្ដាញសារព័ត៌មានក្នុងស្រុកមួយ ដែលបានដាក់ចំណងជើងថា “គណបក្សកាន់អំណាច ត្រៀមខ្លួនសម្រាប់ការមិនជាប់ជាមេឃុំ-ចៅសង្កាត់” នោះ, រដ្ឋមន្ដ្រីក្រសួងព័ត៌មានបានប្រតិកម្មដោយសារក្នុងទំព័រហ្វេសប៊ុកផ្ទាល់ខ្លួនរបស់លោក ថា “តើនោះជាព័ត៌មាន ឬជាការបំពុលព័ត៌មាន?”។
លោកខៀវ កាញារីទ្ធ បានលើកឡើងថា “ជាព័ត៌មានឬជាការបំពុលព័ត៌មាន? ឃើញប្រព័ន្ធផ្សព្វផ្សាយមួយនិយាយថា ថ្នាក់ដឹកនាំ គណបក្សប្រជាជនណែនាំមន្ត្រីខ្លួនជួយរកកន្លែងសំរាប់មេឃុំ ចៅសង្កាត់ ដែលមិនជាប់ឆ្នោត។ ដូចជាកំប្លែងពេកទេដឹង?បើមិនជាប់ឆ្នោត គឺខ្លួនគ្មានការគាំទ្ររបស់ប្រជាជនហើយ ទៅប្រឹងទ្រអីទៀត? ការណែនាំ គឺមេឃុំ ឬ ចៅសង្កាត់ណាដែលមិនឈរជាបេក្ខជនទៀត ក៏ត្រូវតែជួយទំនុកបំរុងគាត់ជាព្រឹទ្ធាចារ្យម្នាក់នៅក្នុងជួរបក្សឃុំ។ ជួយខ្សិបប្រាប់កុំឲ្យគេថាជាអ្នក ក្រ-សែត នាំខូចពូជ។”
គួរបញ្ជាក់ថា កាលពីថ្ងៃទី២ ខែមករា សារព័ត៌មានVOD បានចេញផ្សាយអត្ថបទមួយ ដោយដាក់ចំណងជើងថា“គណបក្សកាន់អំណាចត្រៀមខ្លួនសម្រាប់ការមិនជាប់ជាមេឃុំ-ចៅសង្កាត់។ក្នុងអត្ថបទមួយនោះ សារព័ត៌មានVOD បានលើកឡើងថាគណបក្សប្រជាជនកម្ពុជាបានណែនាំឲ្យក្រុមការងារពង្រឹងមូលដ្ឋាននៃខេត្តនីមួយៗត្រូវ «ទទួលខុសត្រូវ»ចំពោះមេឃុំឬចៅសង្កាត់របស់ខ្លួនដែលគណបក្សនេះថា មិនបានជាប់ឈ្មោះនៅពេលបោះឆ្នោតឆ្នាំ២០១៧៕
