មនុស្ស ២០នាក់ស្លាប់ ដោយសារគ្រោះទឹកជំនន់
Cambodia News/យុវវ័យថ្មី
ដោយ៖ ហេង នាង
ភ្នំពេញ ប្រជាពលរដ្ឋកម្ពុជា បានស្លាប់ ដោយគ្រោះធម្មជាតិទឹកជំនន់ រហូតមកដល់ពេលនេះ មានចំនួន២០នាក់ហើយ ដោយក្នុងនោះ មានក្មេងចំនួន ៨នាក់។ នេះបើតាមការឲ្យដឹងពីមន្រ្តីជំនាញ គ្រប់គ្រងគ្រោះមហន្តរាយ។
កាលពីរសៀលថ្ងៃទី២៦ កញ្ញា លោក កែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹង ថា ទឹកជំនន់បានសម្លាប់ប្រជាពលរដ្ឋចំនួន២០នាក់ហើយ ក្នុងនោះនៅខេត្តកំពង់ចាមមានចំនួន១៤នាក់ ខេត្តឧត្តរមានជ័យមានមាន២នាក់ ខេត្តក្រចេះមាន២នាក់ ខេត្តរតនគីរីមានម្នាក់ និង ខេត្តស្ទឹងត្រែងមានម្នាក់។ ក្នុងចំណោមអ្នកស្លាប់ទាំង២០នាក់នោះមានកុមារចំនួន១១នាក់ ដោយរាប់ចាប់ពីខែសីហា រហូតដល់ខែកញ្ញា ឆ្នាំ២០១៣នេះ។
លោកកែវ វីបានណែនាំដល់បងប្អូនប្រជាពលរដ្ឋរស់នៅតាមដងទន្លេមេគង្គឲ្យ មានការប្រុងប្រយ័ត្នខ្ពស់ចំពោះបញ្ហាទឹកជំនន់នេះក្នុងនោះត្រូវមើល ថែទាំកូនចៅកុំឲ្យលេងទឹកនៅពេលមានទឹកជំនន់ ព្រោះវាអាចបណ្តាលឲ្យមានគ្រោះថ្នាក់ដល់អាយុជីវិត ពិសេសកុមារជាក្រុមងាយរងគ្រោះបំផុត៕