ស្លាប់ទាំងអស់ ក្នុងការធ្លាក់យន្តហោះ អាល់ហ្សេរី AH5017 នៅម៉ាលី
សារព័ត៌មាន Cambodia News/
អៅហ្គាឌូហ្គូ (25 កក្កដា 2014) ៖ ទីភ្នាក់ងារព័ត៌មាន ស៊ីអិនអិន បានចេញផ្សាយ នៅថ្ងៃសុក្រ ទី២៥ ខែកក្កដា នេះ ដោយ លើកឡើង តាមការថ្លែង ពីមន្ត្រីប្រចាំការនៅទីក្រុង អៅហ្គាឌូហ្គូ ក្នុងទូរទស្សន៍ RTB ថា យន្តហោះ របស់ ក្រុមហ៊ុនអាកាសចរណ៍អាល់ហ្សេរី បានធ្លាក់កាលពីថ្ងៃព្រហស្បតិ៍ម្សិលមិញ នេះ ត្រូវបានក្រុមសង្គ្រោះ រកឃើញហើយ នៅឆ្នេរខ្សាច់ភាគខាងជើង ប្រទេសម៉ាលី ដោយគេអះអាងថាបន្ថែមទៀតថា មិនមាននរ ណាម្នាក់នៅរស់រានឡើយ ។
រដ្ឋមន្ត្រីក្រសួងការបរទេសបារាំង លោក Lauren Fabius បានប្រាប់អ្នកយកព័ត៌មាននានាថា យ៉ាង ហោចណាស់មនុស្សចំនួន ១១៦ នាក់ (១១០នាក់ជាអ្នកធ្វើដំណើរ និង៦នាក់ផ្សេងទៀត ជាអាកាស យានិក នៅលើយន្តហោះ AH5017 នេះ) គឺគ្មាននរណាម្នាក់រួចជីវិតពី គ្រោះថ្នាក់នេះឡើយ។ យន្ត ហោះនេះ បានធ្វើដំណើរចេញពីទីក្រុងអៅហ្គាឌូហ្គូ ប្រទេស បួគីណាហ្វាសូ ទៅកាន់ព្រលានយន្តហោះ Houari Boumediene ប្រទេស អាល់ហ្សេរី កាលពីម៉ោង ១ និង ៤៧ រំលងអាធ្រាត ឈានចូលថ្ងៃ ព្រហស្បតិ៍។
វាបានបាត់ចេញពីប្រព័ន្ធរ៉ាដា ដោយសារតែអាកាសធាតុអាក្រក់ បណ្តាលឲ្យផ្នែករ៉ាដាបាត់បង់ ទំនាក់ ទំនងជាមួយ អាកាសយានិក បន្ទាប់ពីយន្តហោះនេះបានហោះចេញទៅប្រមាណជា ៥០នាទីមក។ មន្ត្រី នៅប្រទេសម៉ាលី បានអះអាងថា នឹងដឹកនាំបើកការស៊ើបអង្កេត រក មូលហេតុពិតប្រាកដដែលបណ្តាល ឲ្យយន្តហោះនោះធ្លាក់ ៕
