សុគន្ធ នីសា និងទឹកដីអាមេរិក
Cambodia News
ព័ត៌មានកម្សាន្ត
ភ្នំពេញ៖ បន្ទាប់ពីសម្តែងនៅអាមេរិក និងបារាំងមក ស្រាប់តែមានពាក្យលេចឮថា សុគន្ធ នីសា ត្រៀមវ៉ាលីជាថ្មីដើម្បីចេញទៅសម្តែងនៅលើទឹកដីអាមេរិកជាថ្មីម្តងទៀត។
ប៉ុន្តែពាក្យលេចលឺនេះត្រូវបាន សុគន្ធ នីសា ធ្វើការបដិសេធចោលទាំងស្រុង ដោយបញ្ជាក់ ហេតុផលថា នាងមិនមានគម្រោងទៅអាមេរិកតាមការបរិច្ជេតណាមួយឡើយ។
នៅក្នុងគណនេយ្យហ្វេសប៊ុករបស់សុគន្ធ នីសា នាងបានសសេរបកស្រាយជុំវិញការលេចលឺនេះជាភាសាអង់គ្លេសផង និងខ្មែរផងដោយក្នុងនោះនាងបានធ្វើការបដិសេធចោលទាំងស្រុងចំពោះការលើកឡើងខាងលើនេះ។ នាងនិយាយថា «ចាប់តាំងពីបានបញ្ចប់ការសម្តែងនៅ អាមេរិក និង បារាំងនាពេលថ្មីៗនេះមក ខ្ញុំមិនមានគម្រោងថា ទៅសម្តែងនៅទីនោះដូច ដែលពាក្យចចាមអារាមនិយាយថា នាងខ្ញុំនឹងមានការសម្តែងនៅទីនោះតាមកាលបរិច្ឆេទណាមួយទេ សូមទស្សនិកជនទាំងអស់កុំយល់ច្រលំ និងជឿលើពាក្យចចាមអារាមមិនពិតទាំងនោះ»។
បើទោះបីជាពាក្យលេចលឺនេះមិនមានប្រភពច្បាស់លាស់ក៍ដោយ ប៉ុន្តែពាក្យដែលចេញពីចង្កោមអ្នកស្និតស្នាលរបស់តារាចម្រៀងរូបនេះហាក់សមស្របទៅនឹងសកម្មភាពចុងក្រោយរបស់សុគន្ធ នីសា ខណះពេលដែលនាងហាក់មិនសូវជាអើពើក្នុងការទាញយកប្រជាប្រិយភាពនៅក្នុងស្រុកឡើយ ដោយនាងបានស្រវាយកការសម្តែងនៅក្រៅស្រុកជំនួសវិញ។ ម្យ៉ាងទៀតនាងកំពុងត្រូវបានគេសង្ស័យថា មានបុរសអានិកជនខ្មែរនៅអាមេរិកម្នាក់បានព្យាយាមចាប់ថ្ពក់យកបេះដូងរបស់នាងមកឃុំគ្រងផងនោះ។
គេសង្កេតឃើញថា មួយរយះចុងក្រោយនេះ សុគន្ធ នីសា ហាក់មានការថមថយនូវប្រជាប្រិយភាពយ៉ាងខ្លាំង បើទោះបីជាមុននេះនាងបានប្រញាប់ប្រញាល់ត្រឡប់មកពីការសម្តែងនៅឯបរទេសដើម្បីសម្រុកថតបទចម្រៀងសម្រាប់បុណ្យចូលឆ្នាំខ្មែរក៍ដោយ ប៉ុន្តែសន្ទុះនៃការគាំទ្រទៅលើបទចម្រៀងរបស់នាងហាក់មានការថមថយ មិនដូចក្នុងពេលដែលនាងស្ថិតនៅក្នុងផលិតកម្មហង្សមាសឡើយ។
ទោះជាយ៉ាងនេះក៍ដោយ សុគន្ធ នីសា ហាក់មិនសូវជាចាប់អារម្មណ៍ចំពោះបញ្ហាខាងលើនេះឡើយ ដោយនាងនៅតែបន្តវត្តមានសម្តែងនៅឯក្រៅប្រទេសបន្ថែមទៀតធ្វើឲ្យអ្នកគាំទ្ររបស់នាងមួយចំនួនបានសម្តែងការខកចិត្តយ៉ាងខ្លាំង ។
ការសម្រេចចិត្តយល់ព្រមទទួលយករាល់ការចេញសម្តែងនៅឯក្រៅប្រទេសរបស់ សុគន្ធ នីសា ក្នុងពេលនេះក៍អាចជាមូលហេតុមួយក្នុងកិច្ចខិតខំប្រឹងប្រែងដើម្បីរកប្រាក់បង្គ្រប់ថ្លៃផ្ទះ ដែលនាងបានទិញ ក្រោយពេល ដែលផ្ទះរួមគ្នាជាមួយគូស្នេហ៍ចាស់របស់នាងគឺលោក សុខ ជំនោរទើបតែលក់ដាច់ក្នុងពេលថ្មីៗនេះ។
យ៉ាងណាក៏ដោយ ការស្វែងរកប្រាក់បង្គ្រប់ទិញផ្ទះថ្មី ទំនងមិនមែនជាឧបសគ្គធំសម្រាប់តារាចម្រៀងរូបនេះទេ ព្រោះថា នៅដើមឆ្នាំនេះ នាងបានចេញទៅសម្តែងនៅសហរដ្ឋអាមេរិក រហូតដល់ទៅ៣ខែ ហើយនាងបានបន្តច្រៀងនៅក្នុងប្រទេសបារាំង រយៈពេល១ខែកន្លះបន្ថែមទៀត ដែលបេសកកម្មទាំងពីរនេះត្រូវគេប៉ាន់ប្រមាណថា អាចឱ្យនាងរកចំណូលបានច្រើនក្រាស់ក្រែល ដែលអាចឲ្យនាងអាចបង់រំលស់សម្រាប់ទឹកប្រាក់ដែលនៅសល់នោះ។
គួរកត់សម្គាល់ថា រយះពេល៣ឆ្នាំចុងក្រោយនេះ ខ្សែជីវិតរបស់អ្នកចម្រៀងអភ័ពស្នេហ៍ សុគន្ធ នីសា មានការប្រែប្រួលជាបន្តបន្ទាប់ ក្នុងនោះគេនៅចាំបានថា កាលពីអំឡុងឆ្នាំ២០១១ តារាចម្រៀងរូបនេះបានផ្តាច់ចំណងស្នេហ៍ដ៏កម្សត់កម្រពី កវី សុខ ជំនោរ បន្ទាប់ពីបានស្រលាញ់រួមរស់ជាមួយគ្នាអស់ពេល៨ឆ្នាំ។ បន្ទាប់មកនៅក្នុងឆ្នាំ២០១២ នាងបានប្តូរទ្រនំច្រៀងពីផលិតកម្មរស្មីហង្សមាស ទៅផលិតកម្មថោន ដើម្បីគេចមុខឲ្យផុតពីគូស្នេហ៍ចាស់របស់នាង ដើម្បីចាប់ឈោងអ្វីដែលថ្មីក្នុងវិថីចាស់៕ ស.រ
