រថយន្តមួយគ្រឿង បើកបុកម៉ូតូពីរគ្រឿង ស្លាប់២នាក់ របួសធ្ងន់៣នាក់
ភ្នំពេញ៖ កាលពីវេលាម៉ោង ម៉ោង២០និង៤០នាទីយប់ ថ្ងៃទី១៩ ខែកុម្ភៈ បុរសពីរនាក់បានស្លាប់បាត់បង់ជីវិត និង៣នាក់ទៀតរងរបួសធ្ងន់ធ្ងរ ខណៈដែលពួកគេជិះម៉ូតូពីរគ្រឿងឌុបគ្នា ហើយត្រូវរថយន្តបើកបុកពេញទំហឹង នៅចំណុចមុខអគ្គបញ្ជាការកងទ័ព ស្ថិតក្នុងភូមិត្រពាំងទួល សង្កាត់កំបូល ខណ្ឌពោធិ៍សែនជ័យ។
មុនពេលកើតហេតុគេឃើញ បុរស៤នាក់ជិះម៉ូតូពីរគ្រឿង មួយគ្រឿងម៉ាក ស៊ុយហ្ស៊ុយគី ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ 1AV-4903 ជិះគ្នាពីរនាក់ និងមួយគ្រឿងទៀត ម៉ាកគ្លីក ពណ៌ស ពាក់ស្លាកលេខ ភ្នំពេញ1AJ-6781 ជិះគ្នាពីរនាក់ដូចគ្នា និងបានជិះតាមបណ្ដោយផ្លូវជាតិលេខ៤ ក្នុងទិសដៅពីកើតទៅលិច ស្របទិសគ្នា ខណៈជិះមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿង ម៉ាក KIAvitor ពណ៌ខ្មៅ ពាក់ស្លាកលេខ ភ្នំពេញ 2V-3730 ជិះដោយបុរសពីរនាក់ ក្នុងល្បឿនយ៉ាងលឿន ក្នុងទិសដៅពីលិចទៅកើត បញ្ច្រាសទិសគ្នាជាមួយម៉ូតូ ពេលនោះរថយន្តបង្កហេតុបានរេចង្កូតទៅបុកម៉ូតូពីរគ្រឿង ពេញទំហឹង បណ្ដាលឲ្យបុរសម្នាក់ស្លាប់បាត់បង់ជីវិតនៅនឹងកន្លែងកើតហេតុ និងម្នាក់ទៀតស្លាប់ពេលបញ្ជូនទៅដល់មន្ទីរពេទ្យ ចំណែកឯ៣នាក់ផ្សេងទៀត ត្រូវរងរបួសធ្ងន់បញ្ជូនទៅសង្គ្រោះនៅមន្ទីរពេទ្យ។
ក្រោយពីកើតហេតុ សមត្ថកិច្ចមូលដ្ឋានបានចុះមកឃាត់ខ្លួនអ្នកបើកបររថយន្ត បង្កហេតុ ។ ចំណែកឯម៉ូតូរបស់ជនរងគ្រោះ និងរថយន្តបង្កហេតុ ត្រូវសមត្ថកិច្ចស្ទូចយកទៅរក្សាទុកនៅការិយាល័យចរាចរជើងគោក រាជធានីភ្នំពេញ ដើម្បីដោះស្រាយតាមច្បាប់៕ ហេង នាង
