លោក សម រង្ស៊ី វិលមកកម្ពុជាវិញ នៅព្រឹកនេះ
Cambodia News/
ភ្នំពេញ៖ លោក សម រង្ស៊ី មេដឹកនាំគណបក្សប្រឆាំង នឹងធ្វើដំណើរវិលត្រឡប់មកកាន់ប្រទេសកម្ពុជាវិញ បន្ទាប់មានការលើកលែងទោសពីព្រះមហាក្សត្រ តាមសំណើរបស់សម្តេចតេជោ ហ៊ុន សែន នាយករដ្ឋមន្ត្រី នៅវេលាម៉ោង ៩ និង ៥ នាទីព្រឹក ថ្ងៃទី១៩ ខែកក្កដា ឆ្នាំ២០១៣។
ការវិលត្រឡប់មកកម្ពុជារបស់លោក សម រង្ស៊ី គឺបន្ទាប់ពីលោកបាននិរទេសខ្លួន ចេញទៅក្រៅប្រទេស ដោយខ្លួនឯងអស់ រយៈពេលជាង ៤ឆ្នាំ គិតចាប់ពីចុងឆ្នាំ២០០៩ ដោយសារតែលោក បានប្រព្រឹត្តខុសទាក់ទងទៅនឹងការដកតម្រុយបង្គោលព្រំដែនកម្ពុជា វៀតណាម លេខ១៨៥ នៅស្រុកចន្ទ្រា ខេត្តស្វាយរៀង ការក្លែងបន្លំឯកសារនៅលើផែនទី ការបរិហាកេរ្តិ៍ និងផ្សព្វផ្សាយព័ត៌មានមិនពិត ដោយត្រូវតុលាការផ្តន្ទាទោសកំបាំងមុខ ដាក់ពន្ធនាគារជាង ១០ ឆ្នាំ។
លោក យឹម សុវណ្ណ អ្នកនាំពាក្យគណបក្ស សង្គ្រោះជាតិ បានឲ្យដឹងថា សមាជិកសមាជិកា និងអ្នកគាំទ្រគណបក្ស សង្គ្រោះជាតិ ប្រមាណជា ៤ម៉ឺននាក់ ត្រូវបានរៀបចំ ដើម្បីទៅទទួលលោក សម រង្ស៊ី ពេលវិលមកកម្ពុជាវិញ។ ក្នុងចំនួន៤ម៉ឺននាក់នោះ មាន២ម៉ឺននាក់ទៅទទួលនៅអាកាសយាន្តដ្ឋានអន្តរជាតិភ្នំពេញ និង២ម៉ឺននាក់ទៀត រង់ចាំទទួលនៅទីលានប្រជាធិបតេយ្យ។
ជាមួយគ្នានេះ កំលាំងអាជ្ញាធរ មានសមត្ថកិច្ចប៉ូលិស ប៉េអឹមជាច្រើននាក់ ក៏ត្រូវបានដាក់ពង្រាយតាមដងផ្លូវ ដើម្បីរៀបចំសន្តិសុខ សណ្តាប់ធ្នាប់ នៅតាមដងផ្លូវ និងការពារកុំជនឱកាសនិយមប្រព្រឹត្តអ្វី ដែលធ្វើឲ្យមានភាពចលាចល ពិសេសគឺការពារនូវសុវត្ថិភាពរបស់លោកសមរង្ស៊ី៕