សម្ដេចតេជោ ៖ កម្ពុជានៅតែត្រូវការកិច្ចសហការដោយស្មោះត្រង់ពីសហគមន៍អឺរ៉ុប
សារព័ត៌មាន Cambodia News/
ភ្នំពេញ (២៩ មីនា ២០១៩) ៖ នៅក្នុងវេទិការាជរដ្ឋាភិបាល-ផ្នែកឯកជន លើកទី១៨ នៅព្រឹកថ្ងៃទី២៩ ខែមីនា នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា EBA មិនអាចឋិតនៅ អចិន្ត្រៃយ៍ទេ ប៉ុន្តែទោះជាយ៉ាងណា តទៅអនាគត កម្ពុជា នៅតែត្រូវការកិច្ចសហការលើគ្រប់វិស័យ ជាពិសេស វិស័យ សេដ្ឋកិច្ច រវាងកម្ពុជា និងសហគមន៍អឺរ៉ុប ដោយឥតរើសអើង លើមូលដ្ឋានគោរពគ្នាដោយស្មោះត្រង់។
សម្តេចតេជោ ហ៊ុន សែន បានបញ្ជាក់ថា រាជរដ្ឋាភិបាលនីតិកាលទី៦ បានដាក់ចេញនូវកំណែទម្រង់ដ៏មុតស្រួចនានា ហើយការអនុវត្តដោយជោគជ័យនូវគោលនយោបាយ យុទ្ធសាស្ត្រ និងវិធានការកែទម្រង់មុតស្រួចនានា នឹងអនុញ្ញាត ឱ្យកម្ពុជា អាចឈានទៅចាប់យកនូវមូលដ្ឋានសេដ្ឋកិច្ចថ្មី ដែលពឹងផ្អែកលើឧស្សាហកម្ម បង្កើតតម្លៃបន្ថែមខ្ពស់ ឧស្សាហ កម្មប្រើជំនាញ និងបច្ចេកវិទ្យាជឿនលឿន ប្រកបដោយភាពជឿជាក់ ជាពិសេស អាចឱ្យកម្ពុជា អាចឈរដោយខ្លួនឯង បាន ដោយមិនចាំបាច់ពឹងផ្អែកលើប្រពន្ធអនុគ្រោះពីប្រទេសផ្សេងៗ ទាំងក្នុងពេលបច្ចុប្បន្ន និងទៅអនាគត។
សម្ដេចតេជោ បានបញ្ជាក់ទៀតថា ប៉ុន្តែក្នុងន័យនេះ មិនមែនថាកម្ពុជា មិនត្រូវការនូវកិច្ចសហប្រតិបត្តិការ ដែល ផ្តល់នូវផលប្រយោជន៍ទៅវិញទៅមកប្រកបដោយភាពស្មោះត្រង់នោះទេ កម្ពុជា នៅតែត្រូវការកិច្ចសហការប្រកបដោយ ការគោរពគ្នា ក្នុងនាមជាដៃគូស្មើសិទ្ធិ ស្មើភាព ជាមួយដៃគូខាងក្រៅ។
សម្តេចតេជោ បានថ្លែងថា ទោះមានEBA ក្តី ឬ មិនមានEBAក្តី កម្ពុជា នឹងបន្តធ្វើដំណើរទៅមុខដោយភាពស្វាហាប់ និងភាពជឿជាក់ខ្ពស់ ក្នុងការកំណត់ជោគវាសនារបស់ខ្លួនទៅថ្ងៃអនាគត ឈានទៅសម្រេចឱ្យបាននូវចក្ខុវិស័យ និងបំណងប្រាថ្នាប្រកបដោយមហិច្ឆតារបស់ខ្លួន ពោលគឺក្តាប់យកមកវិញនូវមោទនភាពជាតិ និងកសាងជាតិមួយដ៏រស់ រវើក ឈានឆ្ពោះទៅរកអនាគតដ៏ភ្លឺស្វាង និងត្រចះត្រចង់៕ ដោយ ៖ សហការី
