លោក ជួន សុវណ្ណ ធ្វើការប្រមានអធិការនគរបាលខណ្ឌទាំង៩
សារព័ត៌មាន Cambodia News
ភ្នំពេញៈ ថ្លែងនៅព្រឹកថ្ងៃទី ១១ មេសា ឆ្នាំ២០១៤ ក្នុងពិធីបំពាក់ឋានន្តរស័ក្តិជូនដល់មន្ត្រីនគរបាលចំនួន ៣០ ៨ រូបនៃស្នងការដ្ឋាននគរបាលរាជធានីភ្នំពេញ លោកឧត្តមសេនីយ៍ឯក ជួន សុវណ្ណ ស្នងការរាជធានីភ្នំពេញបានប្រមានយ៉ាងធ្ងន់ៗដល់អធិការនគរបាលខណ្ឌទាំង៦ កុំឱ្យមានការគៀបសង្កត់ ឬប្រព្រឹត្តអំពើទៅលើមន្ត្រីនគរបាលថ្នាក់ក្រោមឱវាន ដើម្បីផលប្រយោជន៍ផ្ទាល់ខ្លួន ដោយមានភាពលំអៀង បក្សពួកនិយម ឬរើសអើងលើការស្នើដើម្បីផ្តល់តំណែងតួនាទី និងឋានន្តរសក្តិជូនដល់មន្ត្រីណាដែលមានស្នាដៃគុណសម្បត្តិល្អក្នុងការបំពេញភារៈកិច្ចការងារនៅមូលដ្ឋាន។
លោកស្នងការរាជធានីរូបនេះ បានបន្តនៅថា «ចំពោះករណីភាពអសកម្មខុសប្រក្រតីខាងលើរបស់មន្ត្រីថ្នាក់ដឹងនាំនគរបាលខណ្ឌ ដោយការិយាល័យបុគ្គលិកនៃស្នងការនគរបាលរាជធានី ត្រូវតែពិនិត្យ និងស្រាវជ្រាវតំឡើងបញ្ជីឱ្យខានតែបានលើមន្ត្រីណាមានអតីតភាពតំឡើងឋានន្តរសក្តិតួនាទី។ មកដល់ ដំណាក់កាលនេះហើយ គួរតែបំបាត់អំពើពុករលួយក្នុងការតែងតាំងតំណែងឋានន្តរសកិ្ខ»។
ក្នុងឱកាសនោះដែរ លោកដាក់បទបញ្ជា និងក្រើនរំលឹកដល់មន្ត្រីនគរបាលរាជធានីភ្នំពេញទាំងអស់ ត្រូវចូលរួមសហការជាមួយប្រជាពលរដ្ឋល្អនៅក្នុងមូលដ្ឋាន ដើម្បីក្តាប់ឲ្យបាននូវមុខសញ្ញាបទល្មើសទាំងឡាយ ទាំងតំបន់ងាយរងគ្រោះ ទីកន្លែងស្មុគស្មាញ បទល្មើសគ្រឿងញៀន ត្រូវបង្ក្រាបឲ្យបាន មិនឲ្យកើតមាននៅក្នុងមូលដ្ឋាននោះទេ ត្រូវចូលរួមគោរពទាំងអស់គ្នា នូវគោលនយោបាយភូមិ-សង្កាត់មានសុវត្ថិភាពទាំង៩ចំំណុច ដែលរាជរដ្ឋាភិបាលបានដាក់ជូន ក្នុងឱកាសពិធីបុណ្យចូលឆ្នាំថ្មី ប្រពៃណី ជាតិខ្មែរខាងមុននេះ។
លោក ជួន សុវណ្ណ ស្នងការនគរបាលរាជធានីភ្នំពេញ ក៏បានផ្តាំផ្ញើទៅមន្ត្រីនគរបាលទាំងអស់ ក៏ដូចជា៖ មន្ត្រីនគរបាលដែលទទួលបានការបំពាក់ស័ក្តិថ្មីៗ នៃស្នងការនគរបាលរាជធានីត្រូវខិតខំបំពេញភារកិច្ចឲ្យបាន ខ្ជាប់ខ្ជួនជូនប្រជាពលរដ្ឋ ក៏ដូចជាជូនជាតិមាតុភូមិផងដែរ ដោយរក្សាភាពថ្លៃថ្នូរ ឲ្យសាកសមជាកងកម្លាំងនគរបាលជាតិ។
ដោយ មិនត្រូវប្រព្រឹត្តអ្វីដែលប្រាសចាកទៅច្បាប់ទម្លាប់នោះទេ ហើយត្រូវធ្វើយ៉ាងណាបង្ក្រាបឲ្យបានរាល់បទល្មើសទាំងឡាយ ដើម្បីរក្សាសុខសុវត្ថិភាពជូនប្រជាពលរដ្ឋ។ សូមបញ្ជាក់ថា មន្ត្រីនគរបាលនៃស្នងការរាជធានីភ្នំពេញចំនួន៣០៨រូប ដែលត្រូវបំពាក់ឋានន្តរស័ក្តិ ក្នុងនោះថ្នាក់វរៈសេនីយ៍ត្រី៤រូប និងថ្នាក់អនុសេនីយ៍ឯកចំនួន៣០៤ រូប៕
