ពុលស្រានៅកំពង់ឆ្នាំងស្លាប់ ៨នាក់ ១០នាក់ផ្សេងទៀត កំពុងសង្គ្រោះបន្ទាន់
សារព័ត៌មាន Cambodia News/
កំពង់ឆ្នាំ (០៨ ធ្នូ ២០១៦) ៖ មានករណីមនុស្សស្លាប់៨នាក់ជាបន្តបន្ទាប់ និងមនុស្សចំនួន១០នាក់ផ្សេងទៀត កំពុងសង្គ្រោះបន្ទាន់ ដែលត្រូវបានប្រពលរដ្ឋដាក់ការសង្ស័យថា បណ្ដាលមកពីពុលស្រាស តែសមត្ថកិច្ចរកឃើញនូវមូលហេតុពិតប្រាកដនៅឡើយទេ។ ហេតុការណ៍នេះ កើតឡើងនៅតំបន់ក្ដុល ភូមិដំណាក់អំពិល និងភូមិក្ដុល ឃុំក្រាំងស្គារ ស្រុកទឹកផុស ខេត្តកំពង់ឆ្នាំង។
ប្រជាពលរដ្ឋរស់នៅតំបន់ក្ដុល បានឲ្យដឹងនៅព្រឹកថ្ងៃ៨ ខែធ្នូ ឆ្នាំ២០១៦នេះថា ពលរដ្ឋក្នុងភូមិដំណាក់អំពិល និងភូមិក្ដុល បានដេកស្លាប់ចំនួន៨នាក់ជាបន្តបន្ទាប់ នៅប៉ុន្មានថ្ងៃមកនេះ ហើយនៅមានជា១០នាក់ផ្សេងទៀត កំពុងសង្គ្រោះបន្ទាន់ នៅមន្ទីរបង្អែកខេត្តកំពង់ឆ្នាំង ក្នុងនោះ មានស្ថានភាពធ្ងន់មានចំនួន២នាក់ និង៨នាក់ទៀត ស្ថានភាពស្រាលឡើងវិញ។
តាមសម្ដីជនរងគ្រោះ បានបញ្ជាក់ថា ប្រជាពលរដ្ឋបានពុលបន្ទាប់ពីពិសារស្រាស ក្នុងពិធីបុណ្យសព៧ថ្ងៃ របស់សាច់ញាតិក្នុងភូមិ ដោយមានអ្នកខ្លះហូបតិច និងអ្នកខ្លះហូបច្រើន ស្រាប់តែយប់មិញ ថ្ងៃទី៧ ខែធ្នូ ឆ្នាំ២០១៦ មានអាការៈ រាករូស ក្អួត ថប់ដង្ហើប និងស្រវាំងភ្នែក ហើយក្រោយមកអ្នកស្រុក បានដឹកជញ្ជូនមកកាន់មន្ទីពេទ្យទាំងយប់ភ្លាមៗ៕
